¡A! Fátima Sapay Qoya Mama; kunan, Perú suyuykupaq, llapantin Amérika Latina suyukunapaqpas, mancharikuy pachataq chayamushan chayqa, mana Diosniyoq komunismo hasut’ita qarqoy, chay suyukunamanta.

Kristiana relijionpa allinman runakunata horqosqan chay tukuy suyukunapi, amapuni munaychu, Diospa kamachisqan simi saroq komunismo kausananta.

Chaypaqyá, ¡Mamalláy!, kausashaqta hap’iy, mirachiytaq, Amérika Latinapi, llapallan tukuy rijch’aq runakuna cheqnisqanta millasqanta.

Kunan nisaq, chaykunata pasaqlla yuyashanaykupaq, yanapawayku:

a) Diospa chunkantin kamachikusqan simikunaqa niwankun: “Diosman sonqo kanki tukuy ima hayk’atapas llallispa”, “aman Diospa qhapaq sutinta qasinmanta hoqarinkichu”, “domingo kunapipas fiesta kunapipas samakunki”, nispa. Mana Diosniyoq komunismotaqmi, iñiyniykuta wañuchiytapuni munan; Dios mana kasukuyman, Dios k’amiyman iman, runakunata tanqaykun, Dios yupachanapaqpas, tukuy imapipas sasachaymanmi churallantaq;

b) Diospa chunkantin kamachikusqan simiqa ninmi: “taytaykita mamaykita yupaychanki”, “aman llunpaq sonqo kayniykita qolluchinkichu”, “amataq runa masiykiq warminta munapayankichu”, nispa. Komunismotaqmi ichaqa, tayta mamantinpa, wawakunantinpa munanakuyninta p’akiyta munan, wawankuq edukasionnintapas Estadoq makinman hap’ichispa. Komunismoqa manan munanchu runakunaq llunpaq sonqo, ch’uya sonqo kanankuta; aswanmi munan; kasarasqakuna, imallaña karqoqtinpas t’aqanakunankuta; warmi qharimanta mayqen kaqninkuq munayllanwanpas t’aqanakunankuta;

c) Diospa chunkantin kamachikusqan simiqa ninmi: “aman suwakunkichu”, “amataq runa masiykiq ima hayk’antapas munapayankichu”, nispa. Komunismotaqmi ichaqa: mana runaq-qa ima hayk’anpas kananchu, nispa nin; hinayá, runakunaqa kaqninkuwan allinyanankuta, hark’akun;

d) Diospa kamachikusqan simiqa ninmi: “aman runata wañuchinkichu” nispa. Komunismotaqmi ichaqa, guerrapi runamasintin maqanakuta kamarin, teqsimuyuntin runaman yuyayninta ch’eqechinanpaq, hinataqmi llapa llaqtakunapi runakunata auqanakuyman, sipinakuyman ima tanqaykun;

e) Diospa kamachikusqan simiqa ninmi: “aman pitapas qasinmanta tunpankichu”, nispa; komunismotaqmi ichaqa, yuyaymantapuni llullakuy huchawan yanapachikun, llapa runaq sonqonman chayayta munaspa.

Amapuni, komunismoqa haykumunanpaq llapa punkuta wesq’aspa, kamariy, suyuykupas, wakin Amérika Latinapi suyukunapas, ruwachunku, kallparichunku; qespinayku hatun p’unchay sispaykamunanpaq, imaynan Fatimapi, suyakuyniyku hunt’aq misk’i simikunawan niwarqankiku hina:

“Qhepamanqa, Llunpaq Sonqoymi atipanqa” nispa.

(con licencia eclesiástica)